मधेशबाटै मधेसी मोर्चाका नेतालाई खुलापत्र (राजबहादुर बोगटी टीकापुर–९ कैलाली)

श्रीमान् मधेसवादी दलका नेताज्यूहरू,

म लामो समयदेखि तराईमा बसोबास गर्ने नेपाली नागरिकताधारी, मधेसी मूलको राष्ट्रभक्त नेपाली । नेपाल भूमिमा छरिएको बुद्धको ज्ञानको ज्योतिले, सगरमाथा र वरपरका हिमालबाट बग्ने हावाले, हिमनदीका पानीले मेरो शरीरलाई पनि छोएकै छ । बिरामी पर्दा पहाडका जडिबुटीले मेरो शरीरलाई पनि निको पारेकै छ । मेरो पसिनाले उब्जेको अन्नबाली हिमाल, पहाडलाई पनि चाहिन्छ, यो सबै एक अखण्ड नेपालमा मात्र सम्भव छ ।
आज देश परिवर्तनको संघारमा छ । एकात्मक केन्द्रीय राजतन्त्रबाट संघीय गणतान्त्रिक मुलुक बन्दै छ । यो बेला मेरो मन, मस्तिष्क पनि सिंगो अखण्ड नेपालसहितको संघीय गणतन्त्रात्मक नयाँ नेपालकै चाहना गर्छ । यही नै मेरो परिचय हो ।
मेरो परिचयले सायद तपाईंलाई सन्तोष नपार्ला । किनभने, तपाईंहरु जस्ता नाम चलेका मधेसी जनताका मसिहा भन्न रुचाउने केही क्षेत्रीयवादी नेताका कारण आज सिंगो मधेस वा तराई अशान्त र आक्रान्त मात्र बनेन, त्यहाँका कलकारखाना, उद्योगधन्दा, व्यापार व्यवसाय, स्कुल लगायत ठप्प छन् । यही बेला एक सच्चा राष्ट्रप्रेमी मधेसी वा तराईबासीका हैसियतले म तपाईंलाई यो पत्र लेख्दै छु ।
कृपया भाषा सम्पादनमा गल्ती हुन गएमा एउटा अन्जान नेपालीको कमी–कमजोरी सम्झेर माफ दिनुहोला । पत्रको सुरुमा कवि माधवप्रसाद घिमिरेको वर्तमान समय सापेक्ष कविताको दुई पंक्ति उद्धृत गर्न मन लाग्यो, ‘उचाई हाम्रो रहला कहाँ हिमाल न रहे, नेपाली हामी रहुँला कहाँ, नेपालै न रहे ।’
Madeshi-Morcha-Meeting कविको यी पंक्ति नै काफी छन्, हामी पहिले नेपाली कि मधेसी ? आज नेपालको सिंगो अस्तित्व मेटाएर मधेसको अस्तित्वको मात्रै कुरा उठेझैँ पनि लागिरहेको छ । सदनदेखि सडकसम्म मधेस, अखण्ड सुदूरपश्चिम लगायत आवाज उठिरहेकै छन् ।
विशेषगरी मधेसको मुद्दा जो अहिले मधेसी नेताले उठाउनुभएको छ, म तपाईंहरुलाई केही कुरा भन्न गइरहेको छु ।
नेताजी तपाईंलाई थाहा छ, देश अहिले इतिहासकै कमजोर तथा संत्रमणकालबाट गुज्रिरहेको छ । नेपाली इतिहासमा नेपालको राष्ट्रियता यति कमजोर भएको थिएन र संविधान निर्माणपछि पनि सायद यस्तो नहोला भन्नेमा हामी सबै नेपाली विश्वस्त छौँ । अहिले हामी नेपाली जनताको सदियौँदेखिको आफ्नो संविधान आफ्नै सहभागितामा बनाउने महान् कार्यको अन्तिम चरणमा छौँ ।
यो महत्त्वपूर्ण घडीमा नेताहरूले देशको अखण्डता, स्वाधीनता र राष्ट्रियताका लागि सोच्नैपर्छ । यो बेला देश टुक्र्याउन खोजियो भन्ने गलत बुझाइ पनि आएका छन् । यस्तो बेला सच्चा राष्ट्रभक्त नेताले साम्प्रदायिक द्वन्द्व फैलाउने खालका उत्तेजित अभिव्यक्ति दिनु कदापि हुँदैन ।
हो तपाईंले भनेजस्तै शासक वर्गले मधेसलाई उपेक्षा गर्दै आएकै हुन् । मधेसी जनता देश विकासको मूल प्रवाहमा समाहित हुन सकेनन्, पाएनन्, दिइएन ।
सेना, प्रहरी, कर्मचारी आदिमा मधेसी जनताको सहभागिता न्यून छ, छँदै छैन भन्न सकिने अवस्थाको । अर्कोतिर, स्वयं मधेसमा पनि धनी र गरिबबीचको खाडल ठूलो छ, कोही जमिनदार छन्, कोही भूमिहीन । यो व्यथा सुदूरपश्चिमको पनि हो । सुदूरपश्चिमका जनताले पनि राज्यका सेवा–सुविधा पाएका छैनन् । उनीहरुको पनि राज्य संयन्त्रमा पहँुच कम छ ।
यही अवस्थालाई लिएर देशमा थुप्रै आन्दोलन भए ।
तपाईं मधेसी नेताजीहरुको अगुवाईमा पनि आन्दोलन भए, भइरहेछन् । अहिले देश विकासको मूल प्रवाहमा मधेसी जनतालाई पनि समेट्ने गरी संविधान बनाउने कुरा उठिरहेको छ । मधेस आन्दोलनबाटै तपाईंहरुले मधेसी मुद्दालाई स्थापित गर्नुभयो । मधेसका मुद्दा उठाउनुको श्रेय तपाईंहरुलाई नै जान्छ । तर, आन्दोलनबाट प्राप्त अधिकारलाई संस्थागत गर्नतिर संयमतापूर्वक लागेको देखिँदैन । किनभने, अहिले सिंगो नेपालीको हितमा मुद्दा नउठेर जातीय, समुदायको मात्र हित सोचेको हो कि जस्तो पनि देखिएको छ । हामी नेपालीबीच जातीय, धार्मिक र भौगोलिक सद्भाव र सहिष्णुता रहँदै आएको हो । तर, अहिले यो केही हदसम्म भड्केको हो कि जस्तो पनि देखिन्छ ।
तपाईंहरूको निर्देशनविपरीत अहिले टीकापुर, नवलपरासी, सिराहा, बर्दिया जस्ता विभिन्न ठाउँमा बन्दकर्ता र बन्दविरोधी बीच झडप भएको खबर आइरहेका छन् ।
हिजो नेपाली समाजमा जातीय, धार्मिक, भौगोलिक सहिष्णुता बाहिरबाट देखिएको थियो, भित्र केही विकृति नभएका होइनन् । यो बखत हामी सबै नेपाली जनताले विवेकपूर्ण र संयमतापूर्वक भएर आफ्ना अधिकार संविधान लेख्नुपर्छ ।
मधेसमा सीमा विवाद पनि छ । भारतीयहरुले नेपाली जनतालाई अनेक प्रकारले थिचोमिचो गर्दै आएका छन् । कहिले नेपाली भूमितिर नदी हुलिदिन्छन्, बेलाबेला सीमा क्षेत्रमा नेपालीलाई दुःख दिन्छन् ।
यो बेला देश र हरेक जनतालाई बलियो बनाउनुछ । यस्तो घडीमा नेपाली जनता, नेता मिल्नैपर्छ ।
मधेसी जनता मात्र होइन, महिला, दलित, जनजाति, सुदूरपश्चिमका जनतालाई पनि देश विकासको मूल प्रवाहमा आउने गरी अधिकार दिनुपर्छ । यी सबैको अधिकार स्थापित गर्न सबै न्यायप्रेमी नेपाली जनता एकजुट हुनैपर्छ । नेताले राष्ट्रभक्त भएर सोच्नैपर्छ ।